البوليسي قبل ما يكون بوليسي راه مواطن. وقبل ما يكون مواطن راه إنسان عندو جميع الحقوق اللي كتكفلها المواثيق الدولية والقوانين الوطنية. وكيفما ملي كنشوفوا بوليسي كينتهك حقوق الإنسان كنتضامنوا مع ضحية الانتهاك حتى ملي نشوفوا واحد كيتعدى على بوليسي خاصنا نتضامنوا مع الضحية لأن هذاك حتى هو انتهاك لحقوق الإنسان. أما باش تكول لي حكا راه كيدير خدمتو اللي كيتخلص عليها من أموال الشعب أولا خاصك تعرف بأن البوليسي كيبقى رهن إشارة الدولة 24 ساعة على 24 و7 أيام على 7 أيام. ويمكن يتحرم حتى من العطلة السنوية ملي كتكون الظروف ماشي هي هاذيك. وبالتالي أشمن خلاص علاش كتدوي؟ احسب ليه شحال كيخدم قبل ما تحسب شحال كياخذ. زيد على هاذ الشي أنه مسكين كتدوز عليه فصول السنة كلها فالشارع صيف وشتا وربيع وخريف. وأنت ناعس وهو سهران. وتجي تكول لي يضربو مجرم وما نتضامنش معاه؟ معنى هذا أنك ببساطة مريض فالعصعص انتاعك. باغي تدير فيها مناضل زعما؟ را احنا كاملين تعرضنا للقمع وللزرواطة من أيام البصري. ولكن هاذي حاجة أخرى وحتى هي ما سكتناش عليها وما يمكنش نسكتوا عليها. وعليه، واجب علينا نتضامنوا مع البوليسي اللي تعرض للاعتداء. السيد راه كان مضحي بنفسو باش يحمي تلاميذ تعرضوا للاعتداء كان ممكن يكون فيهم ولدك ولا بنتك. ولكنكم لا تحشمون!
